المعلومات القانونية والمعطيات الشخصية

اللي يشرف على السيت

السيت يشرف عليه الستوديو روحو. حتى حد آخر ما عندو دخل في المحتوى متاعو.

الستوديو

Dream Studio

العنوان

Bembla and Manarah, Monastir

التليفون

+216 26 255 112

الإيميل

helmibezi86@gmail.com

الإيبرجمون والخدمات التقنية

الصفحات تتسرڥيت من Cloudflare. النصوص والخدمات والحجوزات تتسجل في باز دوني PostgreSQL عند Supabase. التصاور متخزنة في Cloudflare R2. إيميلات الحجز تخرج عبر Resend. التثبت اللي يمنع الروبوات في الفورمولار يعملو Cloudflare Turnstile. هاذو يخدمو السيت وبس : ما يستعملوش المعطيات هاذي لمصلحتهم.

التصاور

كل التصاور اللي موجودة هنا خدمة الستوديو. باش تنسخهم ولا تنشرهم ولا تستعملهم في التجارة تلزمك موافقة مكتوبة. كان تظهر في تصويرة في السيت وتحب تتفسخ، تليفون ولا مساج يكفي : تتفسخ.

شنوة يسجل السيت

باش تشوف السيت ما يطلب منك شي. المرة الوحيدة اللي يسجل فيها حاجة عليك هي كي تبعث طلب حجز. وقتها يسجل :

• اسمك ونمرة التليفون متاعك، باش يجاوبوك ويعرفوك كي تجي ؛
• الإيميل متاعك، كان عطيتو : يخدم كان باش يبعثولك التثبيت ولينك المتابعة ؛
• الخدمة اللي اخترتها، الوقت، البلاصة، عدد الناس، والمساج متاعك كان كتبت واحد.

المعلومات هاذي يقراهم المصور في الباك أوفيس متاع السيت. ما يتباعوش، ما يتعدّاوش لحد آخر، وما يتستعملوش باش يبعثولك ريكلام.

تبقى مسجلة : هي كرني المواعيد متاع الستوديو. ما فماش فسخ أوتوماتيكي بعد مدة، أما تنجم تطلب فسخ متاعك في أي وقت، ويتعمل.

حماية الفورمولار

باش ما يجيش سكريبت يعمر الكلاندريي بطلبات فارغة، الفورمولار يحسب الإرساليات على حساب عنوان IP ونمرة التليفون. العدّادات هاذي تعيش ساعة على الأكثر، ومن بعد التنضيف اليومي يمسحهم. الفورمولار يستعمل زادة Cloudflare Turnstile، اللي يتثبت في النافيغاتور متاعك إنك موش روبو، بلا أحجية.

الكوكيز وقياس الزيارات

ما فماش قياس زيارات، ما فماش تتبّع، ما فماش كوكيز ريكلام. الزيارة متاعك ما تحطش حتى كوكي : الكوكي الوحيد في السيت هو كوكي السيسيون متاع المصور كي يدخل للباك أوفيس. أما خريطة الستوديو تحمّل الفوندات متاعها من OpenStreetMap، وكان غير كي تهبط حتى لها — والتحميل هذا يبيّن عنوان IP متاعك لـ OpenStreetMap، كيما أي تصويرة جاية من سيت آخر.

تلغي، تصلّح، تفسخ

لينك المتابعة اللي يوصلك بعد الطلب يخليك تلغيه بلا ما تبرّر، ما دام الموعد ما فاتش. باش تصلّح معلومة، ولا تفسخ الطلب والمعطيات متاعك، كلّم الستوديو ولا اكتبلو : تتعمل ديراكت، بلا فورمولار.